Աջ ղեկով մեքենաների հարցի շուրջ Տրանսպորտի, կապի և ՏՏ նախարարության պարզաբանումը

Աջ ղեկով մեքենաների հարցի շուրջ Տրանսպորտի, կապի և ՏՏ նախարարության պարզաբանումը 764

Ռադիո Ավրորայի «М20» ծրագրի շրջանակում աջ ղեկով ավտոմեքենաների խնդրի մասին այսօրվա թողարկումից հետո Տրանսպորտի, կապի և ՏՏ նախարարությունն իր պաշտոնական կայքում պարզաբանում է տվել: Նշենք, որ ուղիղ եթերում մեզ հետ կապ էր հաստատել նաև նախարար Վահան Մարտիրոսյանը:

«Վերջին օրերին մի շարք զանգվածային լրատվամիջոցներում և սոցիալական ցանցերում տեղ են գտել հրապարակումներ և մտահոգություններ աջակողմյան ղեկով տրանսպորտային միջոցների հետագա շահագործման հնարավոր սահմանափակումների մասին:

Հաշվի առնելով վաղաժամ, երբեմն հակասական փաստարկները` հարկ ենք համարում պարզաբանել, որ այս պահին աջակողմյան ղեկով տրանսպորտային միջոցների շահագործումը դադարեցնելու, դրանց սեփականատերերի համար պայմաններ սահմանող կամ նրանց իրավունքները սահմանափակող որևէ իրավական ակտ չկա:

Հայաստանի Հանրապետության ճանապարհային երթևեկության կարգավորման բարեփոխումների համատեքստում քննարկվում են խնդրի կարգավորման բոլոր տարբերակները՝ դժվարություններ չստեղծելով այդ տրանսպորտային միջոցների գործող սեփականատերերի համար:

Ընդ որում` այդ քննարկումները ներառում են ճանապարհային երթևեկության անվտանգության տեսանկյունից շահագրգիռ բոլոր կողմերի ներկայացրած առաջարկները, որոնք ավարտուն տեսքի բերվելուց և ամփոփումներից հետո սահմանված կարգով կներկայացվեն թե՛ հասարակությանը և թե՛ շահագրգիռ մարմինների ներկայացուցիչներին»,- ասվում է պարզաբանման մեջ: