Երևանյան դպրոցում կապկպել են, ծեծել և կտրել 1-ին դասարանցու թարթիչները. մայրն ահազանգում է

Երևանյան դպրոցում կապկպել են, ծեծել և կտրել 1-ին դասարանցու թարթիչները. մայրն ահազանգում է 1660

«Զարմանում եմ՝ ինչպես կարելի է 21-րդ դարում նման ձևով վերաբերվել երեխայի հետ ու դպրոցի տնօրինությունն ու դասղեկը, ինչու չէ, նաև մանկավարժական կոլեկտիվը, տեղյակ չլինեն, իսկ մեր՝ նրանց դիմելուց հետո փորձեն ծածկադմփոց անել»,- ասում է 7-ամյա տղայի մայրն, ով ահազանգել է այսօր տեղի ունեցած արտակարգ դեպքի մասին:

Shamshyan.com-ը հայտնում է, որ Հունաստանի և Հայաստանի քաղաքացի, 47-ամյա Մարինե Սարգսյանը պատրաստվում է դիմել Ոստիկանութան պետ, Ոստիկանության գեներալ–գնդապետ Վլադիմիր Գասպարյանին, Կրթության և գիտության նախարար Լևոն Մկրտչյանին, Երևանի քաղաքապետ Տարոն Մարգարյանին, որպեսզի վերջիններս իրենց հսկողության տակ վերցնեն նոյեմբերի 8-ին Երևանի կենտրոն վարչական շրջանի Ջոն Կիրակոսյանի անվան դպրոցում իր տղայի՝ Հունաստանի քաղաքացի, 7-ամյա Մարիոս–Արտյոմ Սարգսյանի նկատմամբ դպրոցում կատարված անմարդկային վերաբերմունքի բացահայտման գործը:

Ֆոտոլրագրող Գագիկ Շամշյանի հետ զրույցում մայրը, ով նաև պատրաստվում է դիմել Հայաստանում Հունաստանի դեսպանատուն, ասում էր. «Նշված դպրոցի զուգարանում իր դասընկերներ՝ Մինասը, Գոռը և Գագիկը բռնություն են կիրառել Սկոտչով կապել են ձեռքերը ու դեմ են տվել պատին, մի քանի հարվածներ են հասցրել, ինչի հետքերը կա մարմնի և քթի վրա, այնուհետև նրանցից մեկն էլ մկրատով երեխայի թարթիչներն է կտրել: Տղաս առողջական խնդիրներ է ունեցել նախկինում և մեծ դժվարությամբ՝ թե՛ Ռուստասնում, թե՛ Իսրայելում բուժումների ենք տարել: Որոշ չափով ապաքինվել էր, գրեթե չէր կակազում, սակայն այս դեպքից հետո երեխայի մոտ նորից սկսվել է վախի մթնոլորտն ու խոսելիս սկսել է նորից կակազել»:

 NEWS.am-ի հետ զրույցում Ջոն Կիրակոսյանի անվան դպրոցի առաջին դասարանի դասղեկ Վերոնիկա Բաբաջանյանն էլ նշեց, որ ահազանգը երեխայի երեւակայության արդյունքն է: Նրա խոսքով, Արտյոմի կտրած թարթիչներն ինքն է նկատել և ահազանգել ծնողներին: Երեխան ուսուցչին և ծնողներին ի սկզբանե ասել է, որ իր թարթիչներն ինքն է կտրել, որից 4 օր անց մայրն ահազանգել է երեխային ծեծի ենթարկելու մասին: