ՏԵՍԱՆՅՈՒԹ. Չփորձեք դուռ ջարդել. Ցուցարար ուսանողները հացադուլ են հայտարարել

Տարկետման իրավունքի վերացման դեմ արդեն մեկ շաբաթ դասադուլ հայտարարած ուսանողներից 5-ը հացադուլ են հայտարարել:  «Հանուն գիտության զարգացման» նախաձեռնության անդամ Դավիթ Պետրոսյանը հայտնել է, որ նույնպես հացադուլավորների թվում է:

«Կոչ ենք անում չփորձել դուռը ջարդել կամ այլ սադրանքների գնալ: Մենք նպատակ չունենք որևէ մեկի հետ կռվի մեջ մտնել: Մեր նպատակն արդար է, խաղաղ է»,-նշել է նա՝ ֆեյսբուքյան իր էջում ուղիղ եթերով:

Նրանք հացադուլ են հայտարարել ԵՊՀ լսարաններից մեկում:

«Եթե դուռը բացվի, կարող է փորձեն մեզ դուրս բերել այստեղից, կամ ասեն՝ դադարեցրեք հացադուլը: Ամեն ինչ կարող էլ տեղի ունենալ: Կարող է ուժ կիրառվել, կարող է չկիրառվել: Կարող է իսկապես բարի կերպով ուզում են մեզ դուրս հանել: Նույնիսկ եթե մարդիկ որոշեն մեզ միանալ, այդ դեպքում՝ էլ դուռը չի բացվելու»,-ասաց նա:

Հիշեցնենք, որ նոյեմբերի 9-ին դասադուլավոր ուսանողները հանդիպել են վարչապետ Կարեն Կարապետյանի, ՊՆախարար Վիգեն Սարգսյանի և ԿԳ նախարար Լևոն Մկրտչյանի հետ: Կառավարությունում երկու ժամ տևած հանդիպման ընթացքում կողմերն այդպես էլ համաձայնության չէին եկել: Իսկ այսօր մեկնարկած ԱԺ քառօրյայի օրակարգում է նաև այդ օրինագիծը: