ՏԵՍԱՆՅՈՒԹ. Ինչը մեկնաբանեմ դրա. Նաղդալյանը՝ մի քանի օրում 2 միլիոնի խոսելու մասին

«Ի՞նչը մեկնաբանեմ դրա, հեռախոսս փչացած է եղել, 3G-ին չի անջատվել, դրանից է եղել»,- ԱԺ-ում լրագրողների հետ զրույցում նման կերպ մեկնաբանեց «Հայաստանի Հանրապետական կուսակցություն» խմբակցության պատգամավոր Հերմինե Նաղդալյանն այն, որ իր ծառայողական հեռախոսով 1 ամսվա խոսակցությունների վճարը 2 մլն դրամ է կազմել։

Հարցին՝ մեկ ամիս շարունակ Ձեր հեռախոսը խնդիր է ունեցել, տեղյակ չե՞ք եղել, Նաղդալյանը պատասխանեց. «Մի ամսվա չէ, մի քանի օր 3G-ին չի անջատվել»։

Անդրադառնալով հարցին՝ արդյո՞ք պատրաստվում է փոխհատուցել, Նաղդալյանը նշեց, թե իրեն նման պահանջ չի ներկայացվել։ Նա հերքեց նաև լուրերը, թե ինքը 2 մլն դրամի խոսել է որդու հետ, ով այս պահին Չինաստանում է, և ում հետ WhatsApp-ով է խոսում: 

Հիշեցնենք, որ «Հայկական ժամանակ» օրաթերթը տեղեկություն էր հրապարակել, որ 2017 թվականի մայիս ամսվա ընթացքում ԱԺ նախկին փոխնախագահ, ԵԽԽՎ պատվիրակության նախկին նախագահ Հերմինե Նաղդալյանի հեռախոսային խոսակցությունների համար մոտ 2 միլիոն դրամ է վճարվել: