Որոշումն ընդունվեց. Ապրիլի 1-ից կարգելվի աջ ղեկով մեքենաների ներկրումը

Որոշումն ընդունվեց. Ապրիլի 1-ից կարգելվի աջ ղեկով մեքենաների ներկրումը 809

Կառավարության այսօրվա նիստում որոշվեց ապրիլի 1-ից արգելել աջ ղեկով մեքենաների ներմուծումն ու գրանցումը: Որոշման ընդունման պատճառը, ըստ  ՀՀ տրանսպորտի կապի և տեղեկատվական տեխնոլոգիաների նախարար Վահան Մարտիրոսյանի, աջ ղեկով մեքենաներով երթևեկելու վտանգավորությունն է: Նա ասաց, որ շահագործման արգելքը վերաբերում է միայն ապրիլի մեկից հետո ներմուծվող ավտոմեքենաներին, իսկ մինչ այդ ներմուծված ու շահագործված աջ ղեկով մեքենաների սեփականատերերը կարող են ազատ տնօրինել դրանք, վաճառել կամ շահագործել:

«Հայաստանում կանոնները սահմանված են ձախակողյան ղեկային կառավարմամբ մեքենաների երթևեկությանը համապատասխան: Բացի այդ, մյուս տեխնիկական միջոցները, ճանապարհային նշանները, գծանշումները, լուսացույցերը տեղակայված են հաշվի առնելով ձախակողմյան ղեկային համակարգով մեքենայի վարորդի համար տեսանելի և ընկալելի լինելու հանգամանքը:

Հետևաբար, աջակողմյան ղեկային համակարգով մեքենաների երթեւեկությունը վտանգ է ներկայացնում ճանապարհային երթեւեկության անվտանգության համար»,- ասաց Վահան Մարտիրոսյանը:

Նա նշեց, որ համաձայն ոստիկանության և ապահովագրական ընկերությունների տվյալների, աջ ղեկով մեքենաների մասնակցությամբ վթարների քանակը մոտ 28 տոկոսով ավել է, իսկ վթարներից վիրավորների քանակը մոտ 39 տոկոսով է ավել, ինչն, ըստ նախարարի, շատ բարձր թիվ է:

ՀՀ փոխվարչապետ Վաչե Գաբրիելյանը իր հերթին նշեց, որ հարկ է նաև օրենսդրական սահմանափակումներ մտցնել ներմուծման վրա. «Խնդրում եմ պատրաստել համապատասխան օրինագիծ և ներկայացնել կառավարությանը, որ ներկայացնենք Ազգային ժողով»,-ասաց նա:

Ի դեպ, դեռևս 2017 թ.-ին ոստիկանությունը ներկայացրել էր  2017 թ.-ի վերջին 10 ամիսների ընթացքում ՃՏՊ-ների վերաբերյալ տվյալներ, ըստ որոնց՝ 2017 թ.-ի նգրանցված 3 հազար 241ավտովթարներից միայն 309-ն էր տեղի ունեցել աջ ղեկով մեքենաների մասնակցությամբ: Ինչը այդ ամիսների վթարների քանակի չնչին տոկոսն է կազմում:

//