Քաղաքապետարանը ծառերի ճյուղերի էտման համար կծախսի 19 մլն դրամ. Armlur.am

Քաղաքապետարանը ծառերի ճյուղերի էտման համար կծախսի 19 մլն դրամ. Armlur.am 151

Երեւանի քաղաքապետարանը հրապարակել է ընթացիկ տարվա գնումների պլանը: «Ժողովուրդ» օրաթերթը տեղեկացավ, որ քաղաքապետարանը այս տարի եւս ոչ մի կոպեկ չի տնտեսելու` շռայլորեն վատնելով համայնքային բյուջեի միջոցները: Քաղաքապետարանի աշխատակազմը նախատեսել է գնել 60 հատ բնական հյութ, որի յուրաքանչյուրի արժեքը կազմում է 1200 դրամ: Հյութից բացի` կգնվի նաեւ 35 հատ շոկոլադ, որի յուրաքանչյուրն արժի 6500 դրամ, եւ ընդհանուր կոնֆետների համար կծախսվի 227 հազար 500 դրամ: Բնականաբար, քաղաքապետարանի աշխատակազմը առանց սուրճի չի մնա. կգնվի նաեւ 32 հատ 2500 դրամանոց լուծվող սուրճ, որի համար ընդհանուր կծախսվի 80 հազար դրամ: Իսկ 600 հատ ապակյա շշով ջրի համար` 90 հազար դրամ, գազավորված հանքային ջրի դեպքում` 30 հազար 450 դրամ: Ծաղկային կոմպոզիցիաների համար եւս քաղաքապետարանը միջոցներ չի խնայել. նախատեսել է ծախսել 8 մլն դրամ: Միայն 100 հատ ծաղկային կոմպոզիցիայի համար մտադրվել են ծախսել 3 մլն դրամ, որի մեկ հատը արժի 30 հազար դրամ: Բացի այս` նախատեսվել է գնել նաեւ 10 հազար դրամանոց 200 հատ ծաղկային կոմպոզիցիա` ընդհանուր ծախսելով 2 մլն դրամ, եւ 60 հատ ծաղկային կոմպոզիցիա` պսակ` 50 հազար դրամանոց, որի համար ընդհանուր ծախսվելու է դարձյալ 3 մլն դրամ: Նաեւ` ընթացիկ տարում քաղաքապետարանը նախատեսում է գնել երկու մարդատար ավտոմեքենա, յուրաքանչյուրը` 10 մլն դրամ արժեքով: Ավիատոմսերի ձեռքբերման համար նախատեսվում է հատկացնել 20 մլն դրամ: Ռեստորաններում սպասարկման ծառայությունների, այլ կերպ ասած, քաղաքապետարանի քեֆերի համար կծախսվի 35 մլն դրամ: Իսկ հյուրանոցային ծառայությունների համար կհատկացվի 35 մլն դրամ: Երեւանի փողոցների, մայթերի, բակային տարածքների սալահատակման եւ ասֆալտապատման աշխատանքների համար նախատեսվել է ծախսել 3 մլրդ 12 մլն 600 հազար դրամ: Իսկ ահա ծառեր գնելու համար 20 մլն դրամ կհատկացվի, իսկ դրանց ճյուղերի էտման համար` 19 մլն 996 հազար 410 դրամ, ուղիղ 3590 դրամով պակաս ծառերի գնման համար նախատեսված հատկացումից: Միայն թե, ցավալի է, որ այս ամենն արվում է երեւանցիների վճարած հարկերի արդյունքում:

Ամբողջական հոդվածը կարող եք կարդալ Armlur.am կայքում