Փոստանջյանի ելույթը՝ ծեծկռտուքից հետո

Երեւանի ավագանու նիստում այսօր տեղի ունեցած միջադեպից հետո Երկիր Ծիրանի խմբակցության ղեկավար Զարուհի Փոստանջյանը հանդես եկավ ելույթով՝ նշելով, որ իշխանությանն այսուհետ միշտ ուղեկցելու է Նուբարաշենի գարշահոտությունը:

Նա, մասնավորապես, նշել է. «Որպես քաղաքական ուժ մենք համոզված ենք, որ այս պահին պետք է դադարեցնել ապրել գարշահոտության մեջ, իսկ այդ գարշահոտությունն ունի 25-ամյա բռնակալական վաղեմություն եւ այդ գարշահոտությունը պետք է զգաք նաեւ դուք: Անկախ նրանից, որ կարող եք դեկտեմբերի 29-ին այստեղ խնջույք հրավիրել, մեր հաշվին կոնյակ խմել, թանկարժեք օծանելիքի բուրմունքը չէ, որ պիտի ձեզ միայն ուղեկցի, այլ պետք է ուղեկցի այն գարշահոտը, որի մեջ մեր պետականությունն եք գցել:

Դուք մի պահ այդ հոտն զգացիք ու իրարանցում տեղի ունեցավ, նույնիսկ հարձակվեցիք տիկին Խաչատրյանի վրա եւ այստեղ նստած պարոնը եւս հարձակում գործեց (նկատի ունի Տարոն Մարգարյանին-խմբ): Վախեցաք, որ գարշահոտությունից խեղդվելո՞ւ եք: Ասեմ, որ գարշահոտությունից չեն խեղդվում, բայց պետք է թունավորվեք, ձեր կյանքը թունավորելու ենք»,-ասել է Փոստանջյանը:

Հիշեցնենք, որ Նուբարաշենի բնակիչները փետրվարի 12-ին փակել էին Նուբարաշեն ՔԿ տանող ճանապարհը. նրանց խոսքով, հարակից տարածում ապրողները տարիներ շարունակ գարշահոտության մեջ են ապրում, շնչում թունավոր օդը:

Հավելենք, որ Երևանի ավագանու «Երկիր Ծիրանի» խմբակցության սենյակում են հայտնվել աղբ և այն տարաները, որոնք ավագանու նիստի ժամանակ բացել և գարշահոտություն էին տարածել: Այս մասին խմբակցության անդամները հայտնեցին լրագրողների հետ զրույցում: Զարուհի Փոստանջյանը հայտարարեց, որ «հավանաբար հավաքարարներն են բացել` «ՀՀԿ» խմբակցության հորդորով»: Նա հավելել է, որ ոստիկանություն են կանչել, որ գան տեսնեն, բայց ոստիկանները չեն ներկայացել:

Տեսանյութը՝ News.am-ի: 

Լրացում.

Երեւանի ավագանու Երկիր Ծիրանի խմբակցությունը լքեց նիստերի դահլիճը: Իրենց որոշումը ներկայացնելիս՝ խմբակցության ղեկավար Զարուհի Փոստանջյանը կրկին հիշեցրեց այսօր առավոտյան տեղի ունեցած միջադեպի մասին: ՛՛Դուք ողորմելի, ծիծաղելի անձնավորություններ եք, որ պաշտպանվում եք ոստիկաններով, ոստիկանական ուժով: Դուք այնպես եք արել, որ մարդիկ գաղթեն այս երկրից, ձեր վարքագիծը ոչնչով չի տարբերվում Օսմանյան կայսրության գործողություններից՛՛,- ասաց Զարուհի Փոստանջյանը: Խմբակցության ղեկավարը վստահեցրեց, որ իրենք ՀՀԿ-ականների առողջության նկատմամբ ոտնձգություն չեն արել, քանի որ իրենք հումանիստներ են: Զարուհի Փոստանջյանի հայտարարությունը Հանրապետականներն ընդունեցին ծափահարություններով:

Երևանի ավագանու ՛՛Երկիր Ծիրանի՛՛ խմբակցության անդամները լրագրողների հետ զրույցում հայտարարեցին, որ իրենց խմբակցության սենյակում հայտնվել է աղբ և այն տարաները, որոնք ավագանու նիստի ժամանակ բացել և գարշահոտություն էին տարածել: Մասնավորապես, Զարուհի Փոստանջյանը հայտարարեց, որ առանց իրենց ներկայության և իմացության բացել են խմբակցության սենյակը և այդ տարաները, մի կույտ աղբ, վառված թղթեր և այլն, թողել այնտեղ: ՛Հավանաբար հավաքարարներն են բացել` ՀՀԿ խմբակցության հորդորով, քանի որ նրանց մոտ եղել է բանալին՛՛,- ասաց նա: Զարուհի Փոստանջյանն ասաց նաև, որ ոստիկանություն են կանչել, որ գան տեսնեն, բայց ոստիկանները չեն ներկայացել: Նշենք նաև, որ մաքրուհիները հերքում են, որ իրենք կապ են ունեցել սենյակը բացելու հարցում: