Նիկոլ Փաշինյանին հիվանդանոց են տեղափոխել

Նիկոլ Փաշինյանին հիվանդանոց են տեղափոխել 669

Բաղրամյանում շարունակվում է ակտիվիստների ցույցը: Նրանց շարքերում, սակայն չկա Նիկոլ Փաշինյանը: Վերջինս հոսպիտալացվել է ցույցի ժամանակ ստացած վնասվածքից հետո: Տեղեկությունը News.am-ին է հայտնել «Քաղաքացիական պայմանագիր» կուսակցության մամուլի պատասխանատու Տիգրան Ավինյանը։ Փաշինյանն առաջին օգնություն ստանալուն պես վերադառնալու է շարժման ակտիվիստների մոտ:

Armtimes.com-ի տվյալներով՝ այս պահի դրությամբ հիվանդանոցում է նաև Երևանի ավագանու անդամ Ալեն Սիմոնյանը: Նրան տեղափոխել են «Գրիգոր Լուսավորիչ» բուժկենտրոն:

Լրատվամիջոցի թղթակիցը հաղորդում է, որ հիվանդանոցներ են տեղափոխվել օպերատորներ Սարգիս Գեւորգյանն ու Զավեն Գրիգորյանը։

Ի դեպ, կան նաև այլ տուժածներ, սակայն հստակ թիվ այս պահի դրությամբ չենք կարող ասել: 

Հավելենք, որ ցույցի վերաբերյալ նախազգուշական հայտարարությամբ է հանդես եկել ոստիկանությունը, որի հայտարարության մեջ գրված է.

«Բաղրամյան պողոտայում Ձեր կողմից ղեկավարվող հավաքի մասնակիցների բռնի գործողությունների արդյունքում կոպտորեն խախտված է հասարակական կարգը:

Ոստիկանության բոլոր նախազգուշացումները, պահանջները և սահմանափակիչ այլ գործողությունները այլևս անարդյունավետ են, ուստի ղեկավարվելով «Հավաքների ազատության մասին» ՀՀ օրենքի 33-րդ հոդվածով՝ ոստիկանությունը Ձեզանից պահանջում է դադարեցնել հավաքը:

Հավաքի վայրում Ձեր բացակայության կամ Ձեր կողմից ոստիկանության պահանջը չկատարելու դեպքում սահմանված ողջամիտ ժամկետի ավարտից հետո Ոստիկանությունը կցրի հավաքը՝ կիրառելով ուժ և հատուկ միջոցներ»: